老豆嘅背影

今晚如往日一樣；放咗工之後；
食完飯都會番去自己嘅工作室；
繼續做自己嘅"秘撈"同一Ｄ往日文件；
工作對我嚟講，就好似每日夠鐘食飯瞓覺咁，
已經冇咗嗰種新鮮感；而變成一種生活習慣。
當番到屋企，就睇見老豆坐咗喺客廳度，
望住部電視，睇緊華麗台嘅節目，
諗住上前向佢打個招呼，點知原來佢唔係睇電視，
而係已經"恰"著咗；睇到老豆滿頭白髮，
就記得媽子曾經同我提過；老豆佢對眼，視力開始減退，
原因係因為長期染髮嘅後遺症，
已經再見唔番老豆"烏捽捽"嘅頭髮，
無幾耐老豆就醒咗，我哋兩父子傾咗一陣，
老豆就話要番房休息，因為坐得太耐，起身嗰陣；
隻左腳有點麻痺，但係佢都唔覺痛；
仲笑笑口咁講咗一句........"老豆真係老喇"
我知佢好開心；因為兩父子好耐都冇傾過計，
睇住老豆慢慢一步步咁上樓梯嘅背影，
我突然醒起一句說話..........
"樹欲靜而風不止，子欲養而親不在"；
而我就同自己講：老豆！以後我會多Ｄ同你傾計㗎喇！